-
పితృస్వామ్య మనస్తత్వంపై ఇన్స్టాలో సుదీర్ఘ పోస్ట్
-
మహిళలను ఇంకా ఆస్తిగానే చూస్తున్నారంటూ ఆవేదన
-
ఫెమినిజం అంటే ఇదేనంటూ గట్టిగా బదులు
సినీ నటి, దర్శకురాలు రేణు దేశాయ్ సోషల్ మీడియాలో ఒక నెటిజన్ చేసిన వ్యాఖ్యలపై ఘాటుగా స్పందించారు. పవన్ కళ్యాణ్ మాజీ భార్యగా ఆమెను అభివర్ణిస్తూ ఒక అభిమాని చేసిన వ్యాఖ్యలను ఆమె తీవ్రంగా ఖండించారు. ఈ విషయంపై రేణు దేశాయ్ తన ఇన్స్టాగ్రామ్లో సుదీర్ఘ పోస్ట్ రాశారు. ఈ పోస్ట్లో సమాజంలో మహిళల పట్ల ఉన్న పితృస్వామ్య ధోరణిని ప్రశ్నించారు. ప్రస్తుతం ఈ పోస్ట్ సోషల్ మీడియాలో పెద్ద ఎత్తున చర్చకు దారితీసింది.
అసలేం జరిగిందంటే?
సోషల్ మీడియాలో ఎప్పుడూ యాక్టివ్గా ఉండే రేణు దేశాయ్కు ఇటీవల పవన్ కళ్యాణ్ అభిమాని ఒకరు కామెంట్ చేశారు. “మిమ్మల్ని మేము ఇంకా పవన్ కళ్యాణ్ భార్యగానే చూస్తాం. మీ జీవితంలో వేరే వ్యక్తిని ఊహించలేం” అని ఆ అభిమాని రాశారు. ఈ కామెంట్ తనను తీవ్రంగా బాధించిందని రేణు దేశాయ్ పేర్కొన్నారు. ఆమె ఆ కామెంట్ స్క్రీన్షాట్ను కూడా తన పోస్ట్కు జత చేశారు. ఇంగ్లీషులో కామెంట్ రాసేంత చదువు ఉన్న వ్యక్తి కూడా మహిళలను ఒకరి ఆస్తిగా చూడటం విచారకరమని ఆమె ఆవేదన వ్యక్తం చేశారు.
రేణు దేశాయ్ ఆగ్రహం, పోస్ట్లోని ముఖ్యాంశాలు
రేణు దేశాయ్ తన పోస్ట్లో పితృస్వామ్య మనస్తత్వం ఇంకా సమాజంలో బలంగా పాతుకుపోయిందని ఆవేదన వ్యక్తం చేశారు. “మనం 2025లో ఉన్నప్పటికీ, స్త్రీలను ఇప్పటికీ భర్త లేదా తండ్రి ఆస్తిగా పరిగణించే పితృస్వామ్య మనస్తత్వం సమాజంలో బలంగా ఉంది” అని ఆమె పేర్కొన్నారు. చదువు, ఉద్యోగం వంటి విషయాల్లో కూడా మహిళలకు నేటికీ ‘పర్మిషన్’ అవసరం అవుతోందని, వారిని వంటగదికి, పిల్లల్ని కనడానికే పరిమితం చేసే ధోరణి ఇంకా కొనసాగుతోందని అన్నారు.
ఈ ధోరణికి వ్యతిరేకంగా తాను గళం విప్పుతానని, భవిష్యత్ తరాల మహిళల కోసమైనా ఈ మార్పు అవసరమని ఆమె స్పష్టం చేశారు. “ఫెమినిజం అంటే వీకెండ్లో తాగి తిరగడం కాదు. మహిళలను పశువులుగా లేదా ఫర్నిచర్లా చూసే ఈ కనీస మైండ్సెట్ను ప్రశ్నించడమే అసలైన ఫెమినిజం” అని ఆమె తన పోస్ట్లో పేర్కొన్నారు. రాబోయే తరాల్లోనైనా స్త్రీలు తమ స్థానాన్ని సంపాదించుకోవాలని, గర్భంలోనే శిశువులను చంపడం, పరువు హత్యలు, వరకట్న మరణాలు వంటివి ఉండకూడదని ఆశిస్తున్నట్లు తెలిపారు. రేణు దేశాయ్ చేసిన ఈ వ్యాఖ్యలు ఇప్పుడు సోషల్ మీడియాలో చర్చకు దారితీశాయి.
Read also : ITHub : హైదరాబాద్ మాదాపూర్లోని ఐటీ హబ్లో భారీ అగ్నిప్రమాదం
